小朋友成日問「點解」問到你有氣冇掟唞？澳洲兒童心理學家話你知點回應先啱
18-36 個月幼兒進入「十萬個為什麼」期，成日追問「點解」，爸媽點樣先可以陪伴孩子好奇心，又唔會攪到自己好攰？（資深澳洲心理學家 Robin，30 年臨床經驗，教你溫柔又堅定嘅回應方法。）
「十萬個為什麼」期，幾乎每個爸媽都經歷過
「點解雪糕會溶？」「點解個天係藍色㗎？」如果你屋企有個 18 至 36 個月大嘅小朋友，呢啲問題你應該一日聽足 100 次。答完一個，佢即刻問「點解」；再答，佢又追多句「點解」。呢個階段喺兒童發展入面相當常見，係孩子探索世界嘅重要過程 —— 但同時，都真係好考驗爸媽嘅耐性同精力。
研究兒童情緒健康超過 30 年嘅澳洲心理學家 Robin 就分享咗一個非常實用嘅角度：好奇心係孩子面對世界嘅能量來源，我哋唔應該遏止；但同一時間，父母嘅精力都需要被照顧，兩者其實可以取得平衡。
點解爸媽唔使一個人「頂住」所有問題？
Robin 提到一個好重要嘅觀念：我哋唔可能回答孩子所有問題，亦都唔需要。與其自己一個人硬撐，不如引入「其他人」嚟分擔 —— 可以係另一半、可以係老師、可以係繪本、甚至係孩子自己去觀察同探索嘅過程。呢個唔係逃避責任，而係讓孩子明白：知識可以有好多來源，唔一定要靠爸爸媽媽一個人。
三歲前後，可以開始咁做：讓孩子見到你「真實嘅一面」
好多父母習慣喺孩子面前扮演「無所不能」嘅角色，但 Robin 建議，當孩子接近三歲，其實可以慢慢讓佢哋了解：爸媽都會攰、都會有唔想繼續嘅時候。呢個唔會削弱你嘅權威，反而會令孩子明白——你都係一個真實嘅人，唔淨係一個「權威典範」。
溫柔堅定回應法：兩句實用句式即刻用得到
Robin 提供咗一個好簡單嘅公式：先肯定，後表達界線。例如：
「我好喜歡你問嘅問題，你觀察到好多嘢呢~ 不過媽媽而家有啲攰喇，我哋遲啲再傾，好唔好？」
「我好鍾意你玩緊嘅遊戲，真係好有趣呢~ 不過我已經玩咗一個鐘，我需要休息一下先。」
如果孩子唔肯接受，繼續追問，Robin 建議父母可以溫柔咁堅持：「我聽到你想繼續，但媽媽真係要休息喇，休息完我哋再玩。」重點唔係拒絕孩子嘅熱情，而係誠實表達自己嘅狀態，同時承諾之後仲會回應。
呢個做法點解對孩子咁重要？
呢種「先肯定、後設界線」嘅溝通方式，其實係一個非常好嘅身教示範。孩子將來喺同朋友相處嗰陣，都要學識點樣拒絕——當朋友話「一齊嚟玩啦！」，佢學識可以話：「而家唔得呀，我畫緊畫添！」呢種能力，正正就係由父母日常生活入面嘅小小示範開始建立。
育兒路上，你唔需要做到完美，只需要做返一個真實、誠實嘅自己。
📢 想了解更多孩子情感發展及育兒資訊？持續留意我們及教育大同的平台，發掘更多專家分享與生活美學！🔍🎭
🎁 Kidsmap 用戶更可以以 78 折優惠購買「善養．同感心自學網課」，優惠碼：Kidsmap，即刻去：ediversity.org
如有查詢歡迎 WhatsApp 53634035 😃
資料來源：教育大同 - ediversity.org
